Antidroga, 45 urdhër-arreste në Itali për shqiptarë, italianë e afrikanë (video)

Detaje të reja janë zbardhur në lidhje me operacionin e zhvilluar këtë të martë në disa zona të Italisë. Autoritetet u angazhuan për të ekzekutuar 45 urdhër-arreste ndaj shtetasve italianë, shqiptarë dhe afrikano-veriorë. Urdhër-arrestet u lëshuan ndaj tyre pasi ata janë pjesë e organizatave mafioze të trafikut ndërkombëtar të drogës nga Amerika Latine, Afrika e Veriut dhe Holanda.

Nga hetimet u zbulua se dy grupet menaxhonin trafikun duke u mbështetur në komunikime të koduara dhe mbështetje nga organizatat më të njohura mafioze. Nga 45 urdhër-arrestet 30 janë me burg, 12 në arrest shtëpie dhe 3 me detyrim qëndrimi. Operacioni u koordinua nga Drejtoria antimafia e Qarkut Brescia.

Grupi i parë kriminal i vendosur në provincën e Brescias menaxhonte trafikun ndërkombëtar të drogës duke importuar kokainë nga Kolumbia me bashkëpunimin e një kontakti lokal të lidhur me “Clan del Golfo”, një organizatë kriminale kolumbiane. Ndërsa hashashi mbërrinte nga Maroku, duke kaluar nëpër Spanjë, ku kishte gjetur strehë një nga të arratisurit.

Grupi i dytë kriminal kishte lidhje familjare me familjet e fuqishme të Ndrangheta, Nirta dhe Strangio di San Luca, si dhe me bashkëpunëtorë shqiptarë. Ata kishin krijuar selinë e tyre në Gussago, në provincën e Brescia duke e shndërruar atë në një qendër magazinimi të drogës që vinte nga jashtë, e destinuar për shpërndarje në të gjithë vendin.

Gjatë hetimeve të nisura në vitin 2022 dhe me gjithsej 87 të dyshuar, u arrestuan në flagrancë 19 persona dhe u sekuestruan rreth 135 kilogramë kokainë, 90 kilogramë hashash, 3 kilogramë marijuanë si dhe 2 pistoleta të kalibrit 45. Në përgjithësi, u vërtetua trafikimi i rreth 2 000 kilogramë kokainë, 1 500 kilogramë hashash dhe 700 kilogramë marijuanë.

Droga, e transportuar në rrugë detare dhe rrugore, duke përfshirë edhe kompani, u gjet në banesa, makina, në një rast brenda një prej tankeve të një kamioni që përdorej për transportin e qumështit dhe në një gurore në provincën e Leçes.

Në prill të vitit 2023, në Reggio Calabria u zbulua dhe sekuestrua një rafineri klandestine për prerjen dhe paketimin e kokainës, aktivitet që kryhej nga shtetas kolumbianë, të cilët mbërritën posaçërisht dhe të pajisur me një recetë të dedikuar për të garantuar cilësinë e përpunimit të lëndës së pastër. Përveç arrestimit në flagrancë të një shtetasi kolumbian dhe një italiani, u gjetën dhe sekuestruan rreth 34 kilogramë kokainë me logot “888” dhe “Cartier”