Falsifikuan dokumentet për 6 prona, arrestohet ish-drejtori i ASHK në Fier, sekuestrohen 715 mijë euro

Ish-drejtori i ASHK Fier, Ertis Shehu, është arrestuar me kërkesë të Prokurorisë së Fierit, nën dyshimin se ka ndihmuar në regjistrimin e paligjshëm të 6 pronave në zonën e Levanit, me sipërfaqe rreth 71.7 hektarë.

Në pranga është vendosur edhe E.H., ndërsa ish-hartografi i ASHK Fier, E.R., është lënë me masën “detyrim për t’u paraqitur”.

Sipas hetimeve, pronat dyshohet se janë regjistruar përmes dokumenteve të falsifikuara dhe më pas disa prej tyre janë shitur.

Gjatë hetimit janë sekuestruar edhe 715,976 euro.

Prokuroria vijon hetimet për zbardhjen e plotë të rastit dhe identifikimin e personave të tjerë të mundshëm të përfshirë.

NJOFTIMI ZYRTAR

Falsifikoi dokumentet për 6 prona me ndihmën e ish-drejtorit të ASHK-së, Prokuroria e Fierit jep masën e sigurimit‘Arrest me burg’ për dy personat nën hetim, masë edhe për topografin

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, u arrestuan shtetasit, Ertis Shehu ish-Drejtor i Agjencisë Shtetërore të Kadastrës dhe përfituesi i pronave, të dyshuara të marra me dokumente të falsifikuara Ervin Habilaj, si dhe u dha masë sigurimi ‘Detyrim për t’u paraqitur para oficerit të policisë gjyqësore’ për shtetasin Emiljano Ruko, ish-hartograf pranë ASHK-së Fier.

Hetimet mbi procedimin penal nr. 1715, datë 05.11.2025, për veprat penale “Falsifikimi i dokumenteve”, “Mashtrimi”, “Pastrimi i produkteve të veprës penale ose veprimtarisë kriminale” dhe “Shpërdorimi i detyrës”, parashikuar respektivisht nga nenet 186, 143, 287 dhe 248 të Kodit Penal, nisën pas dyshimeve për përfitim dhe regjistrim të kundërligjshëm të pasurive të paluajtshme në zonën e Levanit, si dhe tjetërsimin e tyre dhe qarkullimin e vlerave monetare të përfituara.

Fakti penal i dyshuar lidhet me vendimin e vitit 2008 i Agjencisë së Kthimit dhe Kompensimit të Pronave, që parashikonte njohjen e të drejtës së kompensimit për 100 ha tokë bujqësore në zonën e Levanit dhe Dërmënasit. Një prej trashëgimtarëve përfitues, shtetasi Ervin Habilaj ka përfituar më pas, me Vendimin nr. 1944, datë 26.11.2018, të Agjencisë së Trajtimit të Pronave, kompensim financiar në vlerën 53.800.000 lekë.
Pavarësisht kompensimit financiar, nga hetimi dyshohet se gjatë vitit 2023, shtetasi E.H. ka ndjekur procedura për regjistrimin e 6 pasurive në ZK nr. 2436, me sipërfaqe totale rreth 71.7 ha, duke iu referuar Vendimit nr. 246, datë 21.02.2008.

Hetimi deri ne këtë fazë ka evidentuar veprimet e E.S., ish-Drejtor i ASHK Fier, dhe E.R., ish-hartograf pranë ASHK Fier, lidhur me trajtimin administrativ dhe kadastral të dokumentacionit të përdorur për regjistrimin e pasurive.
Pas regjistrimit, disa prej pasurive dyshohet se janë tjetërsuar nëpërmjet shitjes, duke gjeneruar të ardhura në vlera të konsiderueshme. Hetimi vijon për verifikimin e këtyre transaksioneve, gjurmimin e vlerave monetare dhe përcaktimin e destinacionit të tyre.

Gjatë hetimit u sekuestruan edhe 715.976 euro, të depozituar në llogarinë bankare të Ervim Habilaj Si dhe janë sekuestruar dokumente, pajisje elektronike dhe materiale të tjera, të cilat do t’i nënshtrohen verifikimeve të mëtejshme.

Hetimi vijon për dokumentimin e plotë të rrethanave të çështjes, identifikimin e personave të tjerë të mundshëm të përfshirë dhe individualizimin e përgjegjësisë penale.

Gjykata Fier sot pritet të japi kushtet e verifikimit të masës sigurisë ku ku prokuroria ka kërkuar
Emiljano Ruko topograf detyrim paraqitje
Ervin Habilaj përfitues toke arrest burg
Ertis Shehu ish drejyor kadastre në FR arrest burg.