Gjykata e Fierit lë në burg mësuesin 60-vjeçar, dyshohet se ngacmonte me SMS erotike nxënësen 13-vjeçare (foto e video)
Fier – Gjykata e Shkallës së Parë të Juridiksionit të Përgjithshëm Fier ka vendosur masën e sigurisë “arrest në burg” për mësuesin 60-vjeçar, Madrit Sula, nga Lushnja, i cili dyshohet se i dërgonte mesazhe me përmbajtje erotike një nxënëseje 13-vjeçare.
Sula është paraqitur rreth orës 10 e 30 në ambientet e gjykatës së Fierit, ku është zhvilluar seanca për vlerësimin e masës së sigurisë. Seanca ka zgjatur rreth 90 minuta, gjatë së cilës palët kanë paraqitur argumentet dhe provat përkatëse.
Prokurori i çështjes, Skënder Sinanaj, ka paraqitur para gjykatës provat e administruara nga organi i akuzës, ndërsa pala mbrojtëse ka paraqitur argumentet e saj, duke kundërshtuar akuzat e ngritura ndaj mësuesit.
Pas dëgjimit të palëve, gjyqtari Noel Veizi ka vendosur masën e sigurisë “arrest në burg” për Madrit Sulën.
Sipas dyshimeve të hetimit, mësuesi kishte komunikuar përmes telefonit me 13-vjeçaren dhe i kishte dërguar mesazhe me përmbajtje erotike. Rasti është denoncuar nga familjarët e të miturës, të cilët dyshohet se kanë konstatuar komunikimet në telefonin e saj.
Pas marrjes së mesazheve, 13-vjeçarja raportohet se ishte e shqetësuar dhe e tronditur, çka ka bërë që familjarët të drejtohen tek autoritetet dhe të bëjnë denoncimin.
Hetimet për rastin vijojnë, ndërsa mësuesi do të qëndrojë në masën e sigurisë “arrest në burg” deri në një vendimmarrje tjetër të organeve të drejtësisë.
Çështja mbetet nën hetim dhe përgjegjësia penale e të dyshuarit do të përcaktohet nga gjykata në vijim të procesit.
