Mijëra pacientë me kancer në Angli do të kenë akses në një lloj të ri trajtimi që përdor vaksina të personalizuara për të luftuar sëmundjen. Tashmë janë 30 spitale në Britaninë e Madhe që do të marrin pjesë në programin specifik të vaksinimit kundër kancerit.
Vaksinat përdorin teknologjinë mRNA, të ngjashme me atë të përdorur në vaksinat kundër Covid. Ato janë krijuar për të nxitur sistemin imunitar për të njohur dhe shkatërruar qelizat kanceroze si dhe për të zvogëluar rrezikun e rikthimit të sëmundjes.
Pacienti i parë që po trajtohet me një vaksinë të personalizuar kundër kancerit të zorrëve në Angli është Elliot Pfebve, një 55-vjeçar. Ai po merr trajtim në spitalin Queen Elizabeth në Birmingham. “Jam i emocionuar. Kam bërë disa kërkime për trajtimin. Nëse është i suksesshëm, atëherë është një zbulim mjekësor. Mund të ndihmojë mijëra, nëse jo miliona, njerëz të kenë shpresë dhe ndoshta të mos kalojnë atë që kam kaluar” – thotë ai.
Pas trajtimit të tij fillestar, testet treguan se ai kishte ende shenja të ADN-së kanceroze, e cila i vë pacientët në rrezik të shtuar të përsëritjes së sëmundjes. Vaksinat janë krijuar për të parandaluar sëmundjet, por vaksinat specifike të kancerit nuk synojnë si një trajtim parandalues, por po përdoren pasi dikush është diagnostikuar. Ashtu si me vaksinat konvencionale, ato e nxisin sistemin imunitar të kërkojë armikun, në këtë rast kancerin e pacientit.
Një mostër e tumorit të Elliot u dërgua në laboratorët e BioNTech në Gjermani, ku u identifikuan deri në 20 mutacione të lidhura me kancerin e tij. Duke përdorur këtë informacion, u krijua një vaksinë mRNA që përmban udhëzime për t’u dhënë qelizave të Elliott për të prodhuar proteina të përshtatura për qelizat e tij të kancerit.
Vaksina zbulon qelizat e kancerit që janë në gjendje të fshihen në trup, për t’u rishfaqur më vonë. Qëllimi është që vaksina të përmirësojë sistemin e tij imunitar për të kërkuar dhe shkatërruar çdo gjurmë të mbetur të kancerit, duke përmirësuar kështu shanset e tij për të qenë pa kancer në vitet në vijim.
