Lushnje – Tre mjete janë përfshirë në një aksident mesditën e sotme në autostradë në afërsi të fshatit Dushk në Lushnje.
Një e moshuar që udhëtonte në mjetin tip Audi me targa AB 963 DT të drejtuar nga vajza e saj, ndodhet nën kujdesin intensiv të mjekëve në spitalin e Lushnjes. Drejtuesja e audit si dhe dy drejtuesit e tjerë të mjeteve të përfshirë në aksident nuk kanë marrë lëndime.
Policia po disiplinon trafikun dhe po kryen procedurat për nxjerrjen shkaqeve të aksidentit. Paraprakisht dyshohet se kamjoni me targa maqedonase i ka prerë rrugën mjetit tip Audi që kishte hyrë në korsinë e parakalimit. Po kështu dhe furgoni me targa AB 411 CM është përplasur me kamionin.
Pas përplasjes Audi ka përfunduar në mes të rrugës i kthyer me goma përpjetë.
Lushnjë/Informacion paraprak
Rreth orës 14:00, në fshatin Dushk, automjeti tip “Audi” me drejtuese shtetasen A. H., është përplasur me automjetin tip “Benz” me drejtues shtetasin A. K. dhe me automjetin me drejtues shtetasin S. T.
Si pasojë e përplasjes është dëmtuar pasagjerja në automjetin tip “Audi”, shtetasja Sh. S., 65 vjeçe, e cila ndodhet në spital, në kujdesin e mjekëve.
Grupi hetimor po punon për përcaktimin e shkaqeve të aksidentit.
