Kombëtarja shqiptare e ka nisur me fitore aventurën e saj në Ligën e Kombeve, duke marrë tri pikët e para në përballjen ndaj Bjellorusisë. Një sukses i rëndësishëm për kuqezinjtë, të cilët e kanë të qartë objektivin: fitimin e grupit dhe ngjitjen në një tjetër nivel të futbollit europian.
Ndeshja nuk ishte vetëm një mbrëmje futbolli. Përtej fushës, në stadium u shënuan edhe momente proteste politike. Pavarësisht masave të shtuara të sigurisë dhe pranisë së forcave të policisë, disa protestues arritën të fusnin brenda stadiumit banderola me mesazhin “Arrestoni Ramën”.
Për disa minuta, në shkallët e stadiumit u dëgjua edhe thirrja “Rama jep dorëheqjen”, një slogan që është përdorur edhe në protestat e fundit dhe që më pas është shpërndarë gjerësisht në rrjetet sociale.
Megjithatë, në plan të parë mbeti futbolli. Shqipëria e nisi takimin me vështirësi, ndërsa Bjellorusia u shfaq më e rrezikshme në minutat e para, duke ushtruar presion pranë portës kuqezi.
Goli nga pika e bardhë ndryshoi ritmin e takimit. Penalltia e fituar dhe e shndërruar në gol i dha Shqipërisë qetësinë e nevojshme, ndërsa më pas skuadra arriti të kontrollojë më mirë lojën dhe të shfaqë një futboll më agresiv e më ofensiv.
Fitorja ishte edhe një sinjal pozitiv për trajnerin në debutimin e tij zyrtar në krye të Kombëtares, por njëkohësisht vetëm hapi i parë drejt objektivit të vendosur.
https://vt.tiktok.com/ZSb2LWe4w/
Shqipëria garon në një grup ku synimi minimal është fitimi i tij. Përtej kësaj, objektivi madhor mbetet rikthimi në një Kampionat Europian.
Por në këtë garë kuqezinjtë tashmë kanë edhe një rival që ka dhënë sinjalin e parë të fortë.
Finlanda e ka nisur fushatën me një fitore të thellë 7–0, duke marrë tri pikët e para dhe duke vendosur menjëherë presionin në grup. Rezultati tregon se finlandezët nuk kanë ardhur thjesht për të luftuar për një vend në renditje, por për të synuar kreun.
Kështu, Shqipëria e ka kaluar me sukses pengesën e parë, Bjellorusinë, ndërsa përballja me Finlandën pritet të jetë një nga momentet më të rëndësishme të këtij grupi.
Nëse kuqezinjtë arrijnë të ruajnë ritmin, të marrin rezultatet e nevojshme dhe të dalin me pikë nga përballjet direkte me Finlandën, atëherë objektivi për fitimin e grupit mbetet plotësisht i hapur.
Një nisje pozitive për Kombëtaren, por rruga është ende e gjatë. Tri pikët e para janë marrë, ndërsa sfidat që do të përcaktojnë realisht fatin e Shqipërisë në këtë edicion sapo kanë nisur.
