Rritet ndjeshëm numri i turistëve në Gjirokastër për fillimvitin 2026
Gjirokastër – Tre muajt e parë të vitit 2026 kanë sjellë një rritje të ndjeshme të numrit të turistëve që kanë zgjedhur të vizitojnë qytetin e gurit, Gjirokastrën. Sipas drejtorit të trashëgimisë kulturore, Ardis Duke, interesi për këtë qytet historik ka qenë i konsiderueshëm që në fillim të vitit, duke treguar se Gjirokastra mbetet një nga destinacionet më tërheqëse për vizitorët vendas dhe të huaj.
Rrugicat karakteristike me kalldrëm, shtëpitë e vjetra prej guri dhe monumentet historike vazhdojnë të tërheqin vëmendjen e turistëve që kërkojnë të njihen më nga afër me historinë dhe kulturën e qytetit. Vizitorët ndalojnë për të parë nga afër kalanë madhështore, pazarin karakteristik dhe muzeumet që ruajnë një pjesë të rëndësishme të identitetit të kësaj zone.
Sipas Dukes, fluksi i turistëve gjatë kësaj periudhe është një sinjal pozitiv për sezonin turistik që pritet të vijë, duke rritur shpresat se gjatë pranverës dhe verës qyteti do të presë edhe më shumë vizitorë. Kjo rritje e interesit sjell jo vetëm gjallëri në qytet, por edhe ndikim pozitiv për bizneset lokale, guidat turistike dhe sektorin e shërbimeve.
Gjirokastra, e njohur për arkitekturën e saj unike dhe për statusin si pjesë e trashëgimisë botërore të UNESCO, vazhdon të mbetet një pikë referimi për turizmin kulturor në Shqipëri. Çdo vit, mijëra turistë zgjedhin të zbulojnë historinë, traditat dhe bukurinë e këtij qyteti që mbart një trashëgimi të rrallë kulturore.
