Arrestohet “TikTok”- eri më i ndjekur në botë, zbulohet shkaku

TikTokeri më i ndjekur në botë, Khaby Lame, është ndaluar nga autoritetet amerikane të imigracionit më 6 qershor 2025 në Aeroportin Ndërkombëtar Harry Reid të Las Vegasit, për tejkalim të afatit të vizës.

Sipas një deklarate nga Agjencia Amerikane e Imigracionit dhe Doganave (ICE), Lame – 25-vjeçar dhe shtetas italian – kishte hyrë në SHBA më 30 prill, por kishte qëndruar përtej afatit të lejuar. Ai u ndalua të premten dhe u lirua më vonë gjatë së njëjtës ditë, por u detyrua të largohej nga vendi. Deri të shtunën pasdite, vetë Lame nuk kishte reaguar ende publikisht për incidentin.

I njohur për videot ironike dhe pa fjalë që sfidojnë “life hacks” të kota në rrjetet sociale, Khaby Lame ka mbledhur mbi 162 milionë ndjekës në TikTok. Stili i tij i qetë, me mimikë të ftohtë dhe gjestet e famshme me duar të hapura, është kthyer në simbol global.

Fama e tij nisi gjatë pandemisë së vitit 2020, kur humbi punën si mekanik në një fabrikë në Itali. Që atëherë, ai është shndërruar në një ikonë digjitale, duke fituar rreth 16.5 milionë dollarë brenda një viti, sipas Forbes. Aktualisht, ai është edhe ambasador i vullnetit të mirë për UNICEF-in.

Rasti i tij ngre pyetje për procedurat ndaj figurave publike që hyjnë në SHBA për ngjarje mediatike apo komerciale dhe mund të sjellë debat mbi fleksibilitetin e trajtimit të personave me ndikim ndërkombëtar.