“Kutia Pandorës” hapet në Tiranë: Kush i trembet rinumërimit dhe për kë punon KQZ?

Nga redaksia investigative “Ç’të numërojmë sot”

Në Parkun Olimpik sërish do të dëgjohen fishkëllima, por jo nga atletët. Janë kutitë e Tiranës që po përgatiten për maratonën më të gjatë të këtij sezoni: rinumërimin e votës. Plot 1282 kuti, plus 44 të Dibrës, do të zbresin në pistë për një rivotim që duket më shumë si reality show politik sesa proces zgjedhor.

Dy anëtarë të KAS-it, me ndihmën e Kodit Zgjedhor që të jep fuqi hyjnore kur jeni vetëm dy por me vullnet politik të hekurt, i dhanë startin kësaj sage numerike që kërkon më shumë logjistikë se një koncert i Beyoncé-s.

Ndërsa KQZ gërmon për karrige, kabllo, kamera dhe tavolina, pyetja që shkund tastierat e redaksive është: Kush po e trembet rinumërimin e Tiranës dhe kush po përfiton nga kjo “lajthitje tekniko-ligjore”?

Kjo është ajo çka dimë deri tani:
Partia Demokratike kërkon të nxjerrë 1300 vota nga 16 mijë fletë të pavlefshme – si të gjesh ar në thasët me plehëra. Me shpresën që mandati i 14-të t’i kthehet mbrapsht nga qielli elektoral. “Mirë Agron Shehaj, po pse jo edhe Ilir Alimehmeti?,” pyet dikush. Alimehmeti, i cili dyshon se i janë “avulluar” votat, po mban valixhen gati – për çdo rast.

Në kampin socialist, rinumërimi ka ndezur shpresat e atyre që kanë humbur për pak: Xhemal Qefalia, 500 vota pas Rakipit, dhe Blerina Gjylameti, që mund të thërrasë ndonjë numërues nga shkolla e verës për të kërkuar diferencën prej 140 votash me Xhaçkën.

Ndërkohë në KQZ është krizë: “Nuk dimë as sa do të kushtojë kjo,” – thonë burime me sy të skuqur nga mungesa e gjumit. Për transparencë do ketë kamera, por jo për transparencën financiare. Sepse fatura finale mbetet mister, si përfundimi i një telenovele turke.
Pra, kush i trembet rinumërimit? Ata që i kanë marrë votat me avantazh të vogël. Dhe kush përfiton? Ata që kanë më shumë shpresë se vota. Dhe në mes: KQZ, që bën logjistikë për një ring politik ku lojtari më këmbëngulës mund të shndërrohet në fitues, edhe pse loja ka mbaruar prej muajsh.

Nëse ky është proces zgjedhor, atëherë realiteti politik shqiptar është më shumë “Survivor” sesa demokraci. Dhe për fund: Parku Olimpik mund të jetë arena më e përgatitur për sportin e ri kombëtar – rinumërimin. Medaljet? Ndahen më pas, në Kolegj Zgjedhor. Sepse siç thonë në Tiranë: “Votat nuk humbasin… thjesht ndërruan duart!”