Kryetari i bashkisë së Divjakës, Fredi Kokoneshi u sulmua me thikë pas shpine nga Orges Xhelili, një ish-punonjësi bashkisë, që ishte pushuar nga puna disa muaj më parë. Shoferi i kryebashkiakut, Gazmend Bullari, i cili ndërhyri për të mbrojtur Kokoneshin.
Ngjarja ndodhi rreth orës 9:00 të mëngjesit pranë një godine në ndërtim në afërsi të Bashkisë së Divjakës, aty ku shenjat e ngjarjes së rëndë ishin të dukshme deri në mesditë.
Sipas policisë autori, e kishte pritur kryebashkiakun dhe i ka kërkuar llogari për uljen në detyrë të bashkëshortes së tij. Më herët ajo kishte qenë drejtoreshë në bashki, por Kokoneshi kishte vendosur ta zhvendoste në fshat. Pretendimi i Xhelilit ishte se lëvizjet e Kokoneshit ishin të qëllimshme, pasi disa muaj më parë ai kishte hequr vetë atë nga puna.
Në debat e sipër, Xhelili ka nisur ta ofendojë dhe ka nxjerrë thikën duke e qëlluar dy herë në brinjë dhe në shpatull. Shoferi i Kokoneshit është përpjekur të ndërhyjë dhe është goditur me thikë, duke marrë disa plagë në pjesën e barkut.
Sipas mjekëve, kreu i bashkisë së Divjakës ka marrë 4 plagë në shpinë dhe ndodhet për mjekim më të specializuar në spitalin e Traumës, ndërsa shoferi Gazmend Bullari, 45-vjeç, është në gjendje më të rëndë shëndetësore. Ai ka marrë dy plagë në bark, pasi sulmi ka prekur mushkëritë dhe ndodhet në reanimacion në spitalin Fierit.
Sami Osmanim, mjeku kirurg i spitalit të të Lushnjes, ka treguar se dy të plagosurit janë jashtë rrezikut për jetën.
“Kryetari ishte plagosur me dy thikë në toraks (kraharor, kishte një hematomë në toraks të majtë, u drenua dhe iku në spitalin e Traumës. Shoferin, një thikë e kishte prekur në abdomo (bark), hyri në sallë, u përpunua dhe tani po merr mjekim” tha ai për gazetarët.
Xhelili ishte pushuar nga puna si inxhinier IT në Bashki, ndërsa e shoqja drejtoreshë poliklinike në Divjakë, kishte marrë urdhër transferimi në fshatin Tërbuf. Këto janë motivet që dihen deri tani, megjithëse policia nuk ka dalë me një version të ngjarjes.
Nuk është hera e parë që kryetari i bashkisë së Divjakës është sulmuar për shkak të detyrës së tij.
Në korrik të këtij viti, Kokoneshi është dhunuar në mes të qytetit nga 32-vjeçari Dritan Sterkaj. Ka qenë vetë Kokoneshi i cili ka denoncuar se është qëlluar me grusht në fytyrë nga 32-vjeçar.
