Fundi i një epoke, Messi tërhiqet nga Argjentina: “E kam shkruar këtë letër më 21 korrik. Pa babain jam edhe më i bindur”

Lionel Messi nuk do të luajë më me Argjentinën. Lajmin e ka bërë të ditur vetë kapiteni i Kombëtares, finaliste në edicionin e fundit të Botërorit 2026 dhe fituese e edicionit të vitit 2022 në Katar.

Lionel Messi nuk do të luajë më me Argjentinën. Lajmin e ka bërë të ditur vetë kapiteni i Kombëtares, finaliste në edicionin e fundit të Botërorit 2026 dhe fituese e edicionit të vitit 2022 në Katar. Messi ka arritur në këtë vendim pas një periudhe shumë të vështirë të jetës së tij, të përjetuar pikërisht mes fillimit dhe fundit të Botërorit: vdekjes së babait të tij. Një ngjarje që ka ndikuar shumë te personi i tij dhe që ka qenë vendimtare për të marrë këtë vendim: “I kam shkruar këto fjalë më 21 korrik, dy ditë pas finales. Sot, pas asaj që i ndodhi babait tim, jam edhe më i bindur se më parë”.

Zhduket kështu ëndrra e atyre që, ndoshta në mënyrë romantike, kishin menduar se Messi do dhe mund të luante edhe një Botëror të fundit, atë të vitit 2030. “Pas kohës që ka kaluar nga finalja dhe pasi e kam menduar gjatë, dua t’ua bëj të ditur të gjithëve se po largohem nga Kombëtarja… Ka qenë një vendim i dhimbshëm — dhe që ende më dhemb thellë — por e kuptoj se ka ardhur momenti. Ju betohem se gjithmonë kam dhënë gjithçka nga vetja: jo vetëm në këto vitet e fundit kur kemi fituar gjithçka, por edhe më parë; gjithmonë kam luftuar dhe kam dhënë shpirtin në fushë për këtë fanellë, për t’ju dhuruar gëzim dhe për t’ju bërë të ndiheni krenarë që jeni argjentinas përmes futbollit”.

Messi ka dashur kështu t’ia bëjë të ditur gjithë botës vendimin e tij, por qartësisht i drejtohet të gjithë popullit argjentinas që në këto vite e ka mbështetur dhe dashur pa kushte, duke parë tek ai trashëgimtarin e denjë të Diego Armando Maradonës. Ai, ashtu si Pibe de Oro, ka qenë i vetmi që ka arritur ta rikthejë Kupën e Botës në Argjentinë si kapiten dhe protagonist. I vetmi dhe i paimitueshëm lojtar i aftë për ta bërë një popull të tërë të dashurohej edhe më shumë me Albicelesten, falë magjive të tij si kampion. “Koha rrjedh, kapitujt mbyllen dhe ky është një kapitull që më dhemb thellë – vijoi Messi në Instagram –. E dua, e kam dashur dhe do ta dua gjithmonë të jem pjesë e Kombëtares. Kam dhënë gjithçka që kisha; nuk më ka mbetur më asgjë për të dhënë dhe, për më tepër, po shfaqen të rinj të mëdhenj që meritojnë të jenë këtu”.

Messi bën të ditur njëherë e mirë se Argjentina sot është në duar të mira, me Scaloni që është i aftë të nxjerrë në pah talente të tjera të reja, të gatshme të bëjnë sërish një popull të tërë të ëndërrojë. “Faleminderit për gjithë dashurinë që kam marrë gjatë këtyre 20 viteve. Do të më mungojë jashtëzakonisht shumë t’ju dëgjoj nga tribunat ndërsa jam në fushë. Tani do të jem njëri prej jush, për të brohoritur dhe mbështetur skuadrën nga jashtë (në momentet e bukura dhe në ato të këqija, sidomos në ato të këqija). Faleminderit familjes sime që ka qenë gjithmonë aty, që më ka shoqëruar në këtë udhëtim kaq të bukur dhe, njëkohësisht, kaq të vështirë. Faleminderit çdo trajneri, shoku skuadre dhe drejtuesi me të cilët kam ndarë këtë rrugëtim. Marr me vete kujtime dhe momente të paharrueshme. Largohen me qetësinë dhe krenarinë se ju kam dhuruar — së bashku me shokët e mi të skuadrës — momente që dikur mund vetëm t’i ëndërronim. Ka qenë një eksperiencë e pabesueshme ta jetoja me të gjithë ju.

Ju dua! Faleminderit, Zot, që më bëre argjentinas.

Forca Argjentinë!”.