“Mjaft më! Populli kërkon dinjitet, drejtësi dhe ndryshim”, ka qenë ky një prej mesazheve të protestës masive kundër qeverisë së kryeministrit Edi Rama.
Në protestën 35-të të zhvilluar këtë të shtunë kishte një pjesëmarrje masive. Siç duket edhe nga pamjet e siguruara nga lapsi.al bulevardi ka qenë i mbushur nga kryeministria deri në fund të tij.
Një rol ka luajtur edhe pjesëmarrja nga diaspora që zbarkoi në Tiranë për të kërkuar dorëheqjen e kryeministrit Edi Rama.
Duke qenë se protesta e kësaj të shtune përkonte edhe me ditëlindjen e kryeministrit Edi Rama pati edhe disa “dhurata” simbolike.
E para ishte një tortë prej betoni, simbol i betonizimit të natyrës së vendit e shoqëruar me mbishkrimin: “Sa më shumë vite burg”. Një tjetër kishte sjellë një tortë me urimin e Ramës në burg së bashku me Berishën.
Më pas u rrëzua busti i Ramës, një student kishte sjellë kostumin e burgut me brisk dhe sapun ndërsa të tjerë kishin sjellë një arkivol me mbishkrimin “fundi politik”.
Pas fjalimeve, protestuesit iu drejtuan komisariatit 3 në shenjë mbështetje për protestuesit e ndaluar gjatë protestës para Kuvendit që u shoqërua me përplasje.
“Pa dhënë dorëheqje, nuk ndalojmë”, kanë qenë thirrjet e tyre. Revolta është kundër të gjithë klasës politike, ndërsa kanë bërë thirrje që SPAK të hetojë zyrtarët e korruptuar. “Edi Rama f*ck you”, “Rama në burg, Berisha në burg”, vijojnë thirrjet e protestuesve.
