Laguna e Nartës në Vlorë ka ofruar sot një pamje mahnitëse, ku qindra flamingo janë parë duke lëvizur në harmoni mbi ujë, duke krijuar një spektakël të rrallë që ka tërhequr vëmendjen e natyralistëve dhe vizitorëve.
Këto shpendë elegantë, të njohur për qëndrimin në një këmbë dhe ngjyrën karakteristike rozë, janë kthyer në simbol të biodiversitetit të kësaj zone. Lëvizjet e tyre të sinkronizuara në sipërfaqen e lagunës janë filmuar nga vizitorët e pranishëm, duke krijuar një pamje që i ngjan një koreografie të natyrës.
Laguna e Nartës është një nga zonat më të rëndësishme të shpendëve shtegtarë në Shqipëri dhe ndodhet nën mbrojtje të veçantë për vlerat ekologjike që përfaqëson. Flamingot e përfshira në këtë grumbullim madhështor i përkasin llojit Phoenicopterus roseus dhe frekuentojnë lagunën sidomos gjatë stinës së verës dhe në periudhën e migrimit.
