Nga ALB365 – Vetëm pak orë kanë mbetur nga aktiviteti që Partia Socialiste ka organizuar në Apolloni për të shënuar 35-vjetorin e krijimit të saj. Në këtë takim pritet të marrë pjesë kryeministri dhe kryetari i Partisë Socialiste Edi Rama, së bashku me drejtues politikë, deputetë, kryetarë bashkish dhe përfaqësues të strukturave socialiste nga i gjithë qarku i Fierit.
Por përtej festimeve dhe simbolikës së përvjetorit, në bazën socialiste duket se po zhvillohet një debat i fortë. Burime pranë strukturave të Partisë Socialiste në Fier pretendojnë se ditët e fundit është kërkuar angazhim maksimal për të siguruar pjesëmarrje sa më të madhe në aktivitet. Sipas këtyre burimeve, organizatat socialiste janë vënë në lëvizje për të mobilizuar anëtarët dhe mbështetësit, ndërsa kontaktet janë zhvilluar përmes telefonatave të drejtpërdrejta dhe jo me SMS si më parë.
Megjithatë, sipas zërave kritikë brenda së majtës, ekziston një pakënaqësi në rritje mes socialistëve tradicionalë. Ata pretendojnë se në disa institucione dhe kompani shtetërore janë emëruar persona që më parë kanë qenë mbështetës ose aktivistë të forcave të tjera politike, kryesisht të PD dhe PL .
Sipas këtyre pretendimeve, shumë socialistë të vjetër ndihen të anashkaluar dhe shprehen se sakrificat e tyre ndër vite nuk po vlerësohen. Ata ngrenë pikëpyetje mbi mënyrën se si po shpërndahen pozicionet drejtuese dhe vendet e punës, duke argumentuar se në disa raste përfitues kanë qenë individë që deri pak kohë më parë kanë qenë kundërshtarë politikë të Partisë Socialiste.
Nga ana tjetër, mbështetësit e kësaj politike argumentojnë se hapja ndaj individëve nga kampet e tjera politike është një proces normal dhe se çdo forcë politike synon të zgjerojë bazën e saj mbështetëse. Sipas tyre, afrimi i figurave të reja është tregues i forcës politike të Partisë Socialiste dhe i aftësisë së saj për të tërhequr mbështetje edhe përtej elektoratit tradicional.
Në Fier, debatet janë përqendruar veçanërisht te sektori i naftës dhe institucionet që lidhen me të. Kritikët pretendojnë se ndërkohë që një pjesë e punonjësve të vjetër dhe socialistëve janë përballur me pasiguri në punë, individë të afërt me forca të tjera politike kanë përfituar pozicione të ndryshme. Këto pretendime mbeten të pakonfirmuara zyrtarisht, por po diskutohen gjerësisht në bazën socialiste.
Në prag të aktivitetit në Apolloni, pyetja që dëgjohet më shpesh në qarqet politike të Fierit është: a do të jetë kjo një festë e socialistëve tradicionalë apo një demonstrim i zgjerimit të Partisë Socialiste me mbështetës të ardhur nga forca të tjera politike? Urdhëri është dhënë që çdo socialist i punësuar duhet të çojë në aktivitet 10 persona socialistë ndërsa këta socialitët e “adoptuar rishtas” duhet që të çojnë 20 persona që mund ti kenë familjarë apo farefis.
Sipas lëvizjeve të fundit forcat politike të opozitçs PD dhe PL po verpastrohen pasi pazarxhinjtë janë larguar e po largohen nga këto dy forca politike duke u antarsuar në PS, pra po bëjnë “pis” PS, pohoi burimi i i formacionit brënda kësaj force politike.
Pavarësisht debateve dhe pakënaqësive të shprehura nga grupe të ndryshme, aktiviteti i Apollonisë pritet të jetë një nga ngjarjet më të rëndësishme politike të javës. Numri i pjesëmarrësve dhe atmosfera e takimit do të shërbejnë si një tregues i gjendjes së strukturave socialiste në Fier dhe i raportit që ato kanë me bazën e tyre tradicionale.
Mbetet për t’u parë nëse Apollonia do të mbushet nga socialistët e vjetër, nga mbështetësit e rinj të afruar në dy vitet e fundit, nga PD dge PL, apo nga një kombinim i të dyja grupeve. Përgjigjja do të jepet në vetë aktivitetin, aty ku politika kërkon të tregojë forcën e saj përmes pjesëmarrjes dhe mbështetjes qytetare./ ALB365
