Gjirokastër – Në Muzeu i Luftës së Ftohtë, një nga hapësirat më simbolike të historisë së diktaturës komuniste, është çelur një ekspozitë e veçantë kushtuar librave të ndaluar para vitit 1990. Kjo ekspozitë, e cila zhvillohet nga data 24 deri më 27 mars, ka sjellë për publikun një pasqyrë të rrallë të censurës dhe kontrollit ideologjik që ushtrohej mbi mendimin dhe kulturën në Shqipërinë e asaj kohe.
Në ambientet e tunelit prej betoni – një hapësirë që dikur simbolizonte izolimin dhe frikën – janë ekspozuar dhjetëra tituj librash, autorë dhe botime që për dekada me radhë ishin të ndaluara për lexuesin shqiptar. Mes tyre përfshihen vepra të letërsisë botërore, filozofisë, politikës dhe historisë, të cilat konsideroheshin “të rrezikshme” nga regjimi i kohës për shkak të ideve që përçonin.
Vizitorët kanë mundësinë të njihen nga afër me këto botime, të mësojnë historitë e ndalimit të tyre, si dhe të reflektojnë mbi periudhën e errët të censurës. Ekspozita shoqërohet gjithashtu me materiale informuese dhe rrëfime që hedhin dritë mbi mënyrën se si librat qarkullonin fshehurazi apo ruheshin si thesare në bibliotekat personale.
Kjo nismë ka zgjuar interes të madh jo vetëm tek lexuesit vendas, por edhe tek turistët që vizitojnë Gjirokastër, qytetin e gurtë të mbrojtur nga UNESCO. Për shumë prej tyre, ekspozita përbën një mundësi unike për të kuptuar më thellë realitetin kulturor dhe shoqëror të Shqipërisë gjatë periudhës së diktaturës.
Përmes kësaj ekspozite, organizatorët synojnë jo vetëm të rikthejnë në vëmendje vlerat e mohuara të letërsisë dhe mendimit të lirë, por edhe të nxisin reflektim mbi rëndësinë e lirisë së shprehjes dhe të drejtës për të lexuar pa kufizime.
