Cristiano Ronaldo e tepron, humbet finalen me Al Nassr e nuk shkon të marrë medaljen
Finalja e AFC Champions League Two, kompeticioni i dytë më i rëndësishëm për klube në Azi, i dha portugezit Cristiano Ronaldo një tjetër zhgënjim në aventurën e tij arabe. Al Nassr, favorit absolut dhe që luante në shtëpi në Riad, në një “Al-Awwal Park” të mbuluar me ngjyrë të verdhë dhe tifozë vendas, u mposht papritur 1-0 nga japonezët e Gamba Osaka. Vendimtar ishte goli i Hummet në minutën e 30′.
Një tjetër zhgënjim për Ronaldon me Al Nassr
Që kur u transferua në Arabinë Saudite në fillim të vitit 2023 për 200 milionë euro neto në vit, pesë herë fituesi i “Topit të Artë” – që mbushi 41 vjeç në shkurt – ka fituar vetëm një trofe minor, Arab Club Champions Cup. Shumë pak për një “kanibal” si Cristiano, që në këtë finale pati një rast të artë me kokë, por e dërgoi topin jashtë nga pak hapa larg portës. Jo vetëm kaq, ai gaboi edhe një tjetër rast të pastër me të djathtën nga pozicion i favorshëm. Në përgjithësi, paraqitja e tij ishte shumë zhgënjyese.
Ronaldo, shkon në dhomat e zhveshjes: nuk kthehet për medaljen e argjendtë
Pas përfundimit të ndeshjes, Ronaldo u shfaq i shkatërruar emocionalisht. Sulmuesi portugez u largua ngadalë nga fusha, me fytyrë të trishtuar dhe duke tundur kokën në shenjë pakënaqësie. U ul i dëshpëruar në pankinë dhe më pas u drejtua i vetëm drejt dhomave të zhveshjes. Ish-sulmuesi i Real Madrid dhe Juventus nuk u rikthye më për ceremoninë e medaljeve. Arsyeja mbetet e panjohur, edhe pse është e lehtë të imagjinohet se sjellja e tij – jo shumë sportive – ishte diktuar nga dëshpërimi për rezultatin.
Kamerat treguan trajnerin e Al Nassr, Jorge Jesus, duke shoqëruar lojtarët drejt podiumit për të marrë medaljet e argjendta. Vetëm një medalje mbeti aty: Ronaldo nuk kishte aspak ndërmend ta vendoste pranë 33 trofeve të fituar në karrierë, mes tyre edhe pesë Champions League të fituara në Europë. Megjithatë, Cristiano mund ta mbyllë sezonin me një trofe, pasi Al Nassr ka dy pikë avantazh ndaj Al Hilal në krye të Saudi Pro League. Nëse të enjten mposht Damac, skuadrën ku luajnë edhe Mané dhe Joao Felix do të shpallet kampione.
