Studiuesit në Japoni kanë zhvilluar një plastikë që tretet në ujin e detit brenda disa orësh, duke ofruar një zgjidhje të mundshme për një nga ndotësit më të mëdhenj të oqeaneve.
Po aq e fortë sa materialet konvencionale me bazë nafte, plastika e re, e zhvilluar nga Universiteti i Tokios, realizohet duke kombinuar dy monomere jonike për të formuar një lidhje kripe që i lejon asaj të qëndrojë e fortë dhe fleksibël.
Megjithatë, sapo ekspozohet ndaj kripës dhe elektroliteve të tjera në ujin e detit, plastika jotoksike dhe jo e ndezshme zbërthehet në monomeret e saj origjinale, që mund të shpërbëhen më tej nga bakteret.
“Kur e vendosim në një tretësirë ujore me të njëjtin përqendrim kripe si uji i detit, ajo tretet shpejt në rreth dy deri në tre orë, në varësi të përmasave. Në thelb materiali kthehet në përbërësit e vet monomerë”, tha Takuzo Aida, një nga studiuesit kryesorë.
Në një laborator afër Tokios, ekipi i tij demonstroi se si një copë e vogël zhdukej në një enë me ujë të kripur pasi ishte përzier për rreth një orë.
Aida tha se shumë plastika ekzistuese të biodegradueshme nuk janë në gjendje të treten mirë ose plotësisht ndërsa zbërthehen, duke lënë pas mikroplastika të dëmshme që në fund të fundit ndotin oqeanin.
Ndotja nga produktet e plastikës pritet të trefishohet deri në vitin 2040, sipas Programit të Mjedisit të OKB-së, duke shtuar 23-37 milionë tonë mbeturina në oqeanet e botës çdo vit.
Në vitin 2020, rreth 2.7 milionë tonë mikroplastika, fragmente më të vogla se 5 mm në madhësi, u përhapën në mjedis. Studimet e fundit kanë nxjerrë në pah dëmin që mikroplastikat shkaktojnë jo vetëm në jetën detare, por edhe në trupin e njeriut, pasi studiuesit gjetën copa të vogla të kësaj plastike në trurin e njeriut, muret e arterieve dhe organe të tjera.
Ndërsa ekipi ende nuk ka detajuar ndonjë plan për komercializim, Aida tha se hulumtimi i tyre ka tërhequr interes të konsiderueshëm, duke përfshirë sektorin e paketimit.
“Në Japoni, pothuajse të gjitha paketimet janë bërë prej plastike, dhe nëse mund të arrijmë vërtet ta zvogëlojmë këtë, mund të presim më pak dëme mjedisore”, theksoi ai. Aktualisht, më pak se 9% e mbetjeve plastike globale riciklohen me sukses.
