Rreziku nga ekspozimi i tepërt në diell: Ja çfarë duhet të dini 

Edhe pse qëndrimi në diell ndihmon trupin të prodhojë vitaminë D, thelbësore për imunitetin dhe shëndetin e kockave, ekspozimi i zgjatur dhe pa mbrojtje sjell pasoja serioze për organizmin. Mjekët paralajmërojnë se në valët e nxehtësisë si ato që po përjeton aktualisht Europa – me temperatura që shkojnë deri në 40°C – rreziku për probleme shëndetësore rritet ndjeshëm.

Simptomat kryesore të ekspozimit të tepruar në diell përfshijnë:

• Djersitje e tepërt ose mungesa e saj: Nëse lëkura bëhet e thatë dhe e nxehtë, pa djersë, mund të jetë shenjë e goditjes nga vapa, një gjendje e rrezikshme që mund të dëmtojë organet, përfshirë trurin.
• Rrudhat: Rrezet UV përshpejtojnë plakjen e lëkurës, duke shkaktuar rrudha për shkak të shpërbërjes së kolagjenit. Kremi mbrojtës është i domosdoshëm.
• Dëmtime në sy: Ekspozimi i tepërt mund të nxisë shfaqjen e perdes së syrit dhe mjegullimin e shikimit. Syzet me filtra UV janë mbrojtja më efektive.
• Dhimbje muskulare dhe ngërçe: Dehidratimi nga dielli shkakton kontraktime të dhimbshme të muskujve. Pini shumë ujë dhe zhvendosuni në hije. Nëse dhimbjet vazhdojnë, kërkoni ndihmë mjekësore.
• Marramendje dhe konfuzion: Shenja alarmi që tregojnë për goditje nga vapa. Në këto raste, mos e neglizhoni ndihmën profesionale.

Specialistët këshillojnë të kufizoni ekspozimin në diell gjatë orëve më të nxehta të ditës, të përdorni krem mbrojtës, të qëndroni të hidratuar dhe të vishni rroba të lehta dhe mbuluese. Kujdesi është çelësi për një verë të shëndetshme dhe pa rrezik.