Pas një pauze të gjatë nga skena, Shakira është rikthyer fuqishëm me turneun botëror “Las Mujeres Ya No Lloran”, i cili nisi në muajin shkurt të këtij viti dhe ka shënuar një sukses të jashtëzakonshëm ndërkombëtar. Turneu, që ka përfshirë deri më tani qytete të mëdha në Amerikën e Veriut dhe të Jugut, është vlerësuar si një fenomen kulturor që kombinon energjinë elektrizuese të artistes me një skenografi moderne dhe ritme latine të papërmbajtshme.
Në moshën 48-vjeçare, Shakira vazhdon të sfidojë kohën dhe pritshmëritë, duke dhuruar performanca mbresëlënëse që përziejnë pop-in, rock-un dhe folklorin e Amerikës Latine. Albumi i saj i fundit, me të njëjtin titull si turneu, po promovohet me sukses në çdo skenë ku ajo ngjitet.
Pavarësisht disa sfidave teknike dhe anulimeve në Amerikën Latine, përkushtimi i Shakirës ndaj fansave të saj mbetet i palëkundur. Një moment i veçantë nga koncerti në Montreal të Kanadasë ka bërë xhiron e rrjeteve sociale. Teksa performonte hitin e saj të njohur “Whenever, Wherever”, këngëtarja humbi ekuilibrin gjatë një lëvizjeje koreografike dhe rrëshqiti, duke rënë lehtë në skenë.
Megjithatë, në vend që të ndalej, Shakira e përballoi situatën me profesionalizëm të admirueshëm. Ajo u ngrit me një buzëqeshje, nxori gjuhën me humor drejt audiencës dhe vijoi performancën sikur asgjë nuk kishte ndodhur. Reagimi i saj jo vetëm që shmangu çdo ndjesi sikleti, por u kthye në një moment të paharrueshëm të koncertit.
Fansat dhe komentuesit në rrjetet sociale e përgëzuan për mënyrën se si e menaxhoi incidentin, duke e cilësuar si ‘një rënie me stil dhe shkëlqim’.
