Ushtria amerikane trajnon Forcat Ajrore Shqiptare për fikjen ajrore të zjarreve

Ndoshta i vetmi institucion që ka paraprirë për përgatitjet e domosdoshme, të futjes e Shqipërisë në stinën e kërcënimit të zjarreve, ka qenë Ambasada e Shteteve të Bashkuara të Amerikës në Tiranë, e cila përmes një postimi të bërë në faqen zyrtare në Facebook, të kësaj përfaqësie në vendin tonë ka bërë me dije se:
Me nisjen e sezonit veror dhe rritjen e rrezikut të zjarreve, këshilltarët e Ushtrisë Amerikane po ndihmojnë Forcat Ajrore Shqiptare të zhvillojnë më tej aftësitë e tyre operacionale përmes trajnimeve të specializuara.

Në fokus të stërvitjeve, të zhvilluara në Bazën Ajrore të Farkës, është përmirësimi i reagimit ndaj zjarreve, përfshirë edhe përdorimin e “Bambi buckets”, pajisje ajrore të përdorura për fikjen e zjarreve në terrene të vështira.

Ambasada e Shteteve të Bashkuara të Amerikës në Shqipëri bëri të ditur se këto trajnime përfaqësojnë një tjetër hap të rëndësishëm në bashkëpunimin e qëndrueshëm dhe në rritje mes ushtrisë amerikane dhe asaj shqiptare, duke theksuar përkushtimin për forcimin e gatishmërisë rajonale ndaj krizave natyrore dhe emergjencave.