Shkencëtarët nga SHBA dhe Kina kanë bërë një zbulim që mund të përbëjë një hap gjigant në mjekësinë moderne, duke ofruar shpresë për shërimin e sëmundjeve autoimune të pashërueshme deri më sot, si diabeti tip 1, skleroza multiple dhe hepatiti autoimun – sëmundje që ndikojnë tek mbi 10 milionë amerikanë dhe miliona të tjerë në botë.
Studimi, i publikuar në revistën Cell, është rezultat i një bashkëpunimi ndërmjet NYU Langone Health, Akademisë Kineze të Shkencave dhe Universitetit Zhejiang. Shkencëtarët kanë zhvilluar një terapi të re të quajtur BiTS (LAG-3/TCR Bispecific T-cell Silencer), e cila synon të “rindizë” sistemin imunitar dhe të ndalojë sulmet që ai i bën indeve të shëndetshme.
Një qasje inteligjente ndaj T-qelizave
Në kushte normale, T-qelizat – një formë e bardhë e qelizave të gjakut – janë rojet e sistemit tonë imunitar, që luftojnë viruset dhe kancerin. Por në sëmundjet autoimune, ato ngatërrojnë qelizat e trupit me armiq dhe i sulmojnë, duke shkaktuar dëmtime të pakthyeshme. Për vite, shkencëtarët janë përpjekur të kontrollojnë këto qeliza pa e dëmtuar gjithë sistemin imunitar, por pa sukses të qëndrueshëm.
BiTS funksionon duke ndërhyrë në receptorët TCR të T-qelizave dhe në pikën kontrolluese LAG-3, duke e shtypur aktivitetin e dëmshëm të këtyre qelizave vetëm në zonat e prekura – pa dobësuar gjithë sistemin imunitar dhe pa shkaktuar efektet anësore të zakonshme të terapive ekzistuese si kortizonët apo CAR T-cell.
Rezultate premtuese në testet te minjtë
Terapia BiTS u testua fillimisht te minjtë me modele të sklerozës multiple dhe hepatitit autoimun. Rezultatet treguan ulje të ndjeshme të inflamacionit, dëmtimeve dhe përkeqësimit të simptomave. Në rastin e sklerozës multiple, BiTS u dha para shfaqjes së simptomave dhe ndaloi zhvillimin e sëmundjes në mënyrë efektive.
“Kjo qasje mund të përfaqësojë një moment kthese për terapitë autoimune, duke sjellë më afër një trajtim që nuk lufton vetëm simptomat, por rrënjën e problemit,” tha Dr. Jun Wang, autor kryesor i studimit dhe profesor në NYU Grossman School of Medicine.
Përtej simptomave – drejt një kuroje
Aktualisht, pacientët me sëmundje autoimune janë të detyruar të marrin medikamente të forta gjatë gjithë jetës që reduktojnë simptomat, por shpesh vijnë me efekte anësore të rënda si mbipesha, osteoporoza dhe infeksione të shpeshta. BiTS ofron një mundësi të re – ripërpunim i sistemit imunitar nga brenda, në vend të shtypjes së tij me mjete të jashtme.
Ekspertët e kanë cilësuar këtë si një nga përparimet më të mëdha në dekada për sëmundjet autoimune. Nëse rezultatet te njerëzit do të pasqyrojnë ato që janë vërejtur te kafshët laboratorike, atëherë BiTS mund të hapë rrugën për një epokë të re në imunoterapi.
