Studiuesit në Universitetin e Uashingtonit po përpiqen të kuptojnë sjelljet e ushqyerjes së mushkonjave.
“Ato janë shumë të vogla,” tha Jeffrey Riffell, një profesor i biologjisë në UW që studion sistemet shqisore të mushkonjave, sidomos shqisën e tyre të nuhatjes. “Ato kanë një tru shumë të vogël, por megjithatë janë tejet fleksible e të forta për të bërë atë që bëjnë, që na pickojnë.”
Riffell dhe ekipi i tij janë të interesuar për mënyrën se si mushkonjat i gjejnë burimet e tyre ushqimore, duke përfshirë ndryshimin në sjelljen midis mushkonjave mashkullore, të cilat kryesisht ushqehen me nektar, dhe mushkonjave femra, të cilat kërkojnë gjak për të mbështetur prodhimin e vezëve të tyre.
Nëse mendoni se jeni një magnet mushkonjash, ndoshta është kështu. Disa individë kafshohen shumë më tepër se të tjerët, thonë studiuesit.
“Era e lëkurës sonë, djersës, frymës, dyoksidit të karbonit që ne lëshojmë është në fakt një sinjal vërtet i fortë për mushkonjat”, tha Riffell. “Dhe sigurisht, rrobat që kemi veshur.”
Mushkonjat nuk pëlqejnë të bardhën dhe të gjelbrën, por ato tërhiqen në veçanti nga e kuqja dhe e zeza, shton Riffell. Ekipi i tij po studion se si mushkonjat i përdorin shqisat e tyre pamore dhe të nuhatjes për të shënjestruar dhe për të marrë një vakt gjaku.
“Mushkonjat janë shumë të afta për të gjetur një person për t’u pirë gjakun”, shton Riffell. “Ato janë vampire dhe janë shumë të afta në atë që bëjnë. Sytë e tyre, shikimi, hunda e tyre, gjithçka rreth tyre është e orientuar drejt qëllimit për të na gjetur dhe për të na pickuar.”
Mushkonjat gjithashtu mund të mësojnë nga ndërveprimet e tyre. Nëse ju u dukeni tërheqës mushkonjave dhe ju kafshojnë, mund të fillojnë t’u pëlqejë që t’ju kafshojnë. Megjithatë ato munden edhe të mësojnë t’ju shmangin. Nëse përpiqeni t’i mposhtni, ata mund të mësojnë të qëndrojnë larg jush deri në njëfarë mase.
Fatkeqësisht, qindra mijëra njerëz vdesin çdo vit nga sëmundjet e shkaktuara nga mushkonjat, të cilat mund të përhapin malarien, Zikën, dengën, ethet e verdha, Nilin Perëndimor dhe sëmundje të tjera.
“Pra, informacioni që ne po zhvillojmë dhe po gjejmë në laborator ka implikime të botës reale dhe mund të ndihmojë vërtet shumë njerëz në shumë pjesë të ndryshme të botës,” tha Riffell./foxweather-Syrinet
