Avionët luftarakë indianë qëllojnë me raketa bazat ajrore pakistaneze – Pakistani nis hakmarrjen
Të paktën 10 shpërthime në Kashmir – Nuk raportohen viktima – Hapësira ajrore e Pakistanit e mbyllur deri në mesditën e të shtunës
Avionët luftarakë indianë qëlluan me raketa tre baza ajrore në Pakistan, njoftoi një zëdhënës i ushtrisë pakistaneze. Sipas njoftimit avionët luftarakë indianë qëlluan me raketa ajër-tokë në bazat Noor Khan, Murid dhe Sorkot të Forcave Ajrore të Pakistanit, pa raportuar ndonjë viktimë apo dëme të konsiderueshme materiale.
“India tani duhet të presë përgjigjen tonë”, paralajmëroi zëdhënësi i ushtrisë pakistaneze.
Pak kohë më vonë, televizioni shtetëror pakistanez njoftoi se ushtria pakistaneze kishte nisur hakmarrjen kundër “agresionit indian”. Njoftimi erdhi menjëherë pasi Pakistani njoftoi se India kishte sulmuar disa nga bazat e saj ajrore ushtarake.
Dhjetë shpërthime u dëgjuan pranë Aeroportit Ndërkombëtar të Srinagarit në Kashmirin e administruar nga India, thanë zyrtarët.
Shpërthimet pasuan ndërprerjet e energjisë elektrike të shkaktuara nga raketat, të cilat u panë në qiellin mbi qytetin Jammu më herët të premten.
Më parë, një zëdhënës ushtarak pakistanez kishte raportuar në televizionin shtetëror se India kishte lëshuar gjashtë raketa balistike të cilat ranë në territorin indian.
“Dua t’ju sjell një lajm tronditës, pasi India ka lëshuar gjashtë raketa balistike nga Ishujt Andaman dhe Nikobar. “Një nga raketat balistike ra në Ishujt Andaman dhe Nikobar, pesë raketat e mbetura goditën Amritsarin në shtetin indian të Punjabit”, tha ai në një videomesazh, i cili u transmetua rreth orës 2 të mëngjesit të shtunës.
“Ky është një zhvillim tronditës dhe një provokim i nivelit më të lartë, pasi India tani ka filluar të qëllojë me raketa balistike kundër popullsisë së vet”, tha zëdhënësi i ushtrisë pakistaneze, duke nënvizuar se “ky është një veprim që nuk ka logjikë”.
Duke cituar dëshmitarë, agjencia e lajmeve Reuters raporton se shpërthime u dëgjuan në qytetin e Amritsarit.
Pakistani ka mbyllur hapësirën e tij ajrore pas lëshimit të raketave nga India, sipas një zëdhënësi të Autoritetit të Aeroporteve të Pakistanit (PAA).
Mbyllja, e cila filloi në orën 03:15 të mëngjesit sipas orës lokale do të zbatohet për të gjitha fluturimet civile në vend deri në mesditë sipas orës lokale të së shtunës.
Vendet anëtare të G7-ës i kanë bërë thirrje Indisë dhe Pakistanit të tregojnë përmbajtje maksimale, duke u bërë thirrje të dy shteteve të bëjnë përpjekje për të çtensionuar menjëherë krizën, pasi përballja më e keqe në dekada midis fuqive bërthamore fqinje ka marrë jetën e më shumë se 50 civilëve nga të dyja palët.
