Kryetari i Partisë Demokratike, Sali Berisha zhvilloi sot një takim me bashkatdhetarët në Parma.
Në fjalën e tij Berisha iu drejtua emigrantëve shqiptarë në Itali duke u shprehur se ata kanë farkëtuar miqësinë mes Shqipërisë dhe Italisë.
“Historia e miqësisë mes vendeve tona është frymëzuese dhe e rrallë. Ajo daton 500 vite më parë me pritjen në Itali të arbëreshëve dhe vazhdon pareshtur. Sot ju jeni farkëtuesit e miqësisë, e bashkëpunimit, e afrimit të dy kombeve dhe dy vendeve tona, jeni ambasadorë të shkëlqyer të kombit shqiptar në Itali”, tha Berisha.
Berisha u shpreh se takime si ky i Parmës tregojnë se PD po rikthehet fuqishëm.
“Këto takime provohen të një rëndësie të jashtëzakonshme. Këto takime po firmosin shpëtimin e Shqipërisë. Po firmosin përmbysjen e narkoshtetit. Kjo sepse jo vetëm se vota juaj është sot më e çmuar se kurrë në historinë e Shqipërisë, por sepse optimizmi, entuziazmi, energjia e këtyre takimeve e paparë që nga viti 1990 po çon peshë zemrat e shqiptarëve në Shqipëri dhe kudo në botë”, tha Berisha.
“Këto takime, ky entuziazëm, kjo energji po bind çdo qytetar se ne po kthehemi fuqishëm për të mirën e mbarë shqiptarëve, për të mirën e Shqipërisë, të miqve të saj”, theksoi Berisha.
Berisha u shpreh se vota e emigrantëve nuk është vetëm për shpëtimin e Shqipërisë, por është votë për transformimin e saj. “Shqipëria sot po aq sa në vitin 1990, ka nevojë për transformime epokale”, tha Berisha.
