BMW nxjerr të njëjtin model me benzinë dhe elektrik – versioni EV 

Prej vitesh, analistët e industrisë së automobilave kanë parashikuar se do të vinte momenti kur makinat elektrike do të kushtonin më pak se modelet e krahasueshme me motorë me djegie të brendshme.

Dhe duket se ky moment po afrohet më shpejt nga sa mendohej.

BMW ka prezantuar gjeneratën 2027 të Serisë 3 në versione me benzinë dhe plotësisht elektrike, duke ofruar një krahasim të drejtpërdrejtë mes dy teknologjive. Rezultati është interesant: modeli elektrik kushton 4,400 dollarë më pak.

BMW M350 xDrive me motor me djegie të brendshme ka një çmim fillestar prej 65,900 dollarësh, ndërsa modeli elektrik i3 50 xDrive kushton 61,500 dollarë. Në të dyja rastet, çmimet nuk përfshijnë tarifat e transportit dhe dorëzimit.

Të dy modelet kanë nivele të përafërta fuqie, dizajn të ngjashëm dhe synojnë pothuajse të njëjtën kategori blerësish.

Megjithatë, versioni elektrik është rreth 6.7 për qind më i lirë.

Sigurisht, ekziston edhe një version dukshëm më ekonomik i Serisë 3 me benzinë, i cili aktualisht nuk ka një ekuivalent të drejtpërdrejtë elektrik.

BMW 330 i vitit 2027 nis nga 49,900 dollarë, ndërsa varianti 330 xDrive kushton 51,900 dollarë.

Edhe pse modelet e krahasuara mbajnë të njëjtën familje emërtimi, ato janë ndërtuar mbi platforma të ndryshme.

BMW i3 elektrik përfiton nga arkitektura dhe teknologjia më e re e kompanisë, ndërsa Seria 3 me motor tradicional mbështetet në një version të përmirësuar të platformës ekzistuese.

Për shumicën e drejtuesve, ndryshimi më i madh praktik do të jetë mënyra e furnizimit me energji: karikimi i baterisë kundrejt mbushjes së rezervuarit me karburant.

Por edhe këtu diferenca po bëhet më e vogël.

Autonomia e Serisë 3 me benzinë pritet të jetë e ngjashme me modelet e mëparshme, afërsisht 450 milje, ose rreth 724 kilometra, me një rezervuar në versionin me tërheqje në të katër rrotat.

BMW thotë se i3 elektrik mund të përshkojë deri në 468 milje, rreth 753 kilometra, me një karikim të plotë.

Teknologjia e karikimit të shpejtë është gjithashtu një pjesë e rëndësishme e modelit të ri. Sipas BMW-së, vetëm 10 minuta karikim të shpejtë mund të shtojnë deri në 208 milje, apo rreth 335 kilometra, autonomi.

Për personat që bëjnë vazhdimisht udhëtime shumë të gjata, ndryshimi mes karikimit dhe furnizimit me benzinë mund të vazhdojë të ketë rëndësi. Për shumicën e drejtuesve të përditshëm, megjithatë, hendeku praktik po zvogëlohet ndjeshëm.

Për vite me radhë, argumenti kryesor ekonomik për makinat elektrike ishte se, megjithëse kushtonin më shumë në momentin e blerjes, shpenzimet e tyre përgjatë viteve mund të ishin më të ulëta falë energjisë dhe mirëmbajtjes.

Me modele si BMW i3 i ri, ky raport mund të jetë duke ndryshuar.

Tashmë, në disa raste, makina elektrike nuk po fiton avantazh vetëm në koston afatgjatë të përdorimit, por edhe në çmimin fillestar të blerjes