Fier – Denoncim i fortë nga kandidati i ASHM për qarkun Fier, Arben Çuko: Shtabi i PS pranë qendrës së votimit në Levan

Një situatë shqetësuese është denoncuar publikisht nga kandidati i Aleancës për Shqipërinë Moderne (ASHM) për qarkun Fier, Arben Çuko. Gjatë një deklarate para mediave, Çuko ka ngritur alarmin për një rast që sipas tij përbën ndikim të padrejtë në procesin zgjedhor.

Sipas denoncimit, një godinë që më parë ka shërbyer si qendër votimi dhe më pas është përdorur nga bashkia për shërbime për moshën e tretë, është kthyer aktualisht në shtab elektoral të Partisë Socialiste në njësinë administrative Levan. Ironikisht, qendra e re e votimit është vendosur menjëherë ngjitur me këtë godinë, ku tashmë janë afishuar edhe listat e votuesve.

“Ky është një shembull i qartë sesi po tentohet të influencohet procesi zgjedhor në mënyrë të papranueshme,” u shpreh Çuko.

A është kjo një rast tipik i keqpërdorimit të institucioneve publike për qëllime elektorale?

ASHM i bën thirrje institucioneve përkatëse të marrin masa dhe të garantojnë një proces zgjedhor të ndershëm dhe të barabartë për të gjithë.