Lushnje – Rrethanat e vdekjes së 48-vjeçares Shpresa Cani janë ende të paqarta. Dihet se ajo u fut në bashki për të kërkuar rikthimin e ndihmës ekonomike, që ia kishin hequr. Dihet se ndërroi jetë brenda zyrës së kryetares së Bashkisë Lushnje, Eriselda Sefa. Por nuk dihet si e trajtuan aty dhe çfarë ndikoi në vdekjen e saj të menjëhershme.
![](https://alb365.com/wp-content/uploads/2022/12/640-0-1672312596xipiccy-image-2022-12-29t111331733-438.jpg)
Dy versionet për vdekjen e Shpresa Canit
Sipas versionit të parë që doli në media, qytetarja u përcoll nga njëra zyrë në tjetrën, për të kërkuar ndihmë ekonomike. Takoi fillimisht shefen e Ndihmës Sociale, që është edhe bashkëshortja e deputetit të PS, Luan Çela. Pastaj tentoi të gjente zgjidhje direkt te kryetarja Eriselda Sefa. Kur hyri në zyrën e saj, policët tentuan ta nxirrnin jashtë dhe gruaja ndërroi jetë për shkak të stresit që kishte përjetuar.
Sipas versionit që dha Bashkia e Lushnjes gruaja u trajtua me dinjitet, mori sqarime dhe iu premtua kthimi i ndihmës ekonomike. “Kryetarja e Bashkise priti në zyrë të interesuarën” thuhet në njoftimin zyrtar, ku pasqyrohet edhe kujdesi I veçantë që ka treguar Eriselda Sefa.
Përkujdesja e kryetares së Bashkisë dallohet edhe më tej në njoftim kur thuhet: “pasi degjoi shqetësimin e Zonjës Cani, Kryebashkiakja Sefa therriti Drejtoreshen e Shërbimit Social pranë bashkisë Lushnje për të parë mundësinë e ndihmes shtesë nga buxheti bashkiak, përvec pagesës se invaliditetit. Pati një dakortësi që në janar të shihej mundësia për ta futur në skemat e ndihmës nga buxheti bashkiak, mirëpo në një moment Zonja Cani është ndjerë keq”.
![](https://alb365.com/wp-content/uploads/2022/12/321558969_430083029230006_2799473869691440602_n.jpg)
Festë me FRESSH pas vdekjes në zyrë
Nëse prokuroria nuk heton më tej, ngjarja do të mbetet mister. Askush nuk mund të ngrejë sot akuza për zyrtarët e Bashkisë së Lushnjes, megjithatë njoftimi zyrtar duket i rremë.
Siç tregojnë fotot më poshtë, ditën që i ndodhi vdekja e Shpresa Canit në zyrën e saj, kryetarja e bashkisë Eriselda Sefa shkoi të festonte me Taulant Ballën dhe të rinjtë e FRESSH-it. Ajo vazhdoi programin e festimeve të fundvitit, megjithëse pak më parë i kishte mbetur e vdekur në zyrë, një grua që kërkonte ndihmën ekonomike.
Pamjet e festës u publikuan nga i dërguari i PS në Lushnje, Taulant Balla që ka qenë përkrah kryetares së Bashkisë. Fotot e festës e zhbëjnë tërësisht aspektin njerëzor që tentohet të përcillet në njoftimin e bashkisë për mediat.
Pas festës së FRESSH, ngjarja u mbajt e fshehtë. As Bashkia, as policia e shtetit nuk dhanë asnjë njoftim të martën për gruan që vdiq në zyrën e kryetares së bashkisë, në pritje të ndihmës ekonomike.