Pas një dite të gjatë pune, vendosja e kohës për të ngrënë darkë shpesh mund të jetë sfiduese, veçanërisht nëse jeni të zënë ose me një orar të paqëndrueshëm.
Por sipas dietologëve, koha kur hani darkën ka ndikim të drejtpërdrejtë në shëndetin tuaj dhe gjumin e natës.
Dietologia Marissa Meshulam Karp thotë se ora ideale për të ngrënë darkën është midis orës 17:00 dhe 19:00.
Nëse kjo nuk është e mundur, këshillohet që të konsumoni vaktin të paktën tre orë përpara se të flini.
Kjo i jep trupit kohë për ta tretur ushqimin dhe zvogëlon rrezikun e refluksit e acidit. Kolegia e saj, Elizabeth Brown, thekson se koha optimale varet edhe nga madhësia dhe përbërja e ushqimit – sa më i rëndë të jetë vakti, aq më shumë kohë i duhet trupit për ta tretur. Vaktet e pasura me yndyrë, si hamburgerët me patate të skuqura, mund të zgjasin deri në gjashtë orë për t’u tretur plotësisht, duke shkaktuar ndonjëherë shqetësime në stomak, rritje të aciditetit dhe probleme me gjumin.
Të hash shumë herët, si rreth orës 15:00, mund të shkaktojë uri të madhe më vonë gjatë natës, duke e bërë të vështirë gjumin. Në raste të tilla, rekomandohet një meze e lehtë para gjumit që përmban karbohidrate, proteina dhe yndyrna, pasi karbohidratet ndihmojnë në prodhimin e serotoninës, e cila më pas shndërrohet në melatoninë, hormonin e gjumit.
Në të kundërt, të ngrënit shumë vonë gjithashtu nuk është ide e mirë, pasi organet e tretjes punojnë më ngadalë gjatë natës. Nëse hani afër kohës së gjumit, trupi përpiqet njëkohësisht të tretë dhe të flejë, gjë që e pengon pushimin cilësor.
Nëse puna ose angazhimet ju detyrojnë të qëndroni deri vonë, përpiquni të hani një vakt të plotë më herët gjatë ditës. Kështu do të shmangni urinë ekstreme në mbrëmje dhe nuk do të tundoheni të hani sasi të mëdha apo ushqime të pashëndetshme.
Sipas dietologëve, vakti duhet të jetë i pasur me proteina, yndyrë të shëndetshme dhe fibra. Një shembull i mirë është një mollë me gjalpë kikiriku si meze pasditeje.
Të ngrënit në të njëjtën kohë çdo ditë është gjithashtu i rëndësishëm për ritmin cirkadian të trupit, ose orën e brendshme biologjike.
Kjo rutinë ndihmon në rregullimin e funksioneve metabolike dhe ul rrezikun e sëmundjeve si diabeti dhe sëmundjet e zemrës. Për ta bërë më të lehtë mbajtjen e një orari të rregullt, këshillohet përgatitja paraprake e vakteve, që t’ju kursejë kohë dhe vendime në fund të ditës.
Në fund, nuk ka vetëm një ‘kohë perfekte’ për darkë, por parimi kryesor është që ajo të jetë në një orar të qëndrueshëm dhe të lejojë kohë të mjaftueshme për tretje para gjumit. iefimerida
