Kia prodhuesi korean i makinave, po prezanton linjën e re të furgonëve elektrikë me platformën PBV (Platforma Përtej Automjetit), që synon të ripërcaktojë automjetet komerciale elektrike. Qëllimi nuk është vetëm prodhimi i furgonëve, por krijimi i një platforme modulare që përshtatet me nevojat e transportit profesional, logjistikës urbane dhe lëvizshmërisë së pasagjerëve.
Në qendër të kësaj linje qëndron PV5, modeli i parë i cili shënon fillimin e këtij projekti të ri. PV5 është projektuar si një automjet fleksibël, i aftë të përshtatet si për transport mallrash, ashtu edhe për përdorim me pasagjerë, duke ofruar konfigurime të ndryshme sipas nevojës.
Pas tij, Kia planifikon zgjerimin e linjës me dy modele të tjera: PV7 dhe PV9. Këto emërtime i referohen automjeteve më të mëdha dhe më të avancuara brenda së njëjtës familje. PV7, i parashikuar për vitin 2027, pritet të ofrojë më shumë hapësirë dhe kapacitet transporti, duke synuar kryesisht përdorim më intensiv profesional dhe logjistik. Ndërsa PV9, që pritet të mbërrijë në vitin 2029, do të jetë modeli më i madh i linjës, me kapacitet maksimal dhe konfigurime edhe më të avancuara për përdorim komercial të nivelit të lartë.
Kia thekson se kjo qasje nuk synon thjesht ndërtimin e një furgoni elektrik, por krijimin e një platforme të projektuar nga themeli për të përmbushur nevojat moderne të lëvizshmërisë, si në qytet ashtu edhe në përdorim privat apo profesional.
Platforma është zhvilluar duke marrë parasysh fleksibilitetin në madhësi, gjatësi dhe konfigurim, duke iu përshtatur si mjediseve urbane të ngarkuara, ashtu edhe kërkesave për gamë dhe kapacitet më të madh.
