‘Na bllokon online, na gjen në shesh!’, pankartat me mesazhe të forta për Ramën
Kur popullit i fshihesh, me ç’fytyrë pushtetit i ngjitesh?’
Kjo është një prej pankartave që qytetarët kanë mbajtur në duar gjatë protestës së 108-të kundër qeverisë dhe kryeministrit Edi Rama.
Protestuesit kanë zgjedhur ironinë dhe mesazhet politike për të përcjellë pakënaqësinë ndaj qeverisë, duke iu drejtuar drejtpërdrejt kryeministrit dhe zhvillimeve të fundit politike në vend.
Një prej pankartave shkruan:
‘Rama jashtë, problem me shqiptarët. Balluku në Tiranë, problem me qytetarët. Kur popullit i fshihesh, me ç’fytyrë pushtetit i ngjitesh?’
Ndërsa një tjetër pankartë i referohet bllokimit të qytetarëve në rrjetet sociale dhe pranisë së tyre në protestat e opozitës:
‘108 na bllokon online. Na gjen në shesh!’
Mesazhet e protestuesve nuk janë kufizuar vetëm te qeveria, por kanë prekur edhe sistemin e drejtësisë dhe përplasjet e fundit mes ekzekutivit dhe magjistratëve.
‘Pagat e gjyqtarëve, shfaqje e qëllimshme, skandalet e Ramës, heshtje e dhimbshme!’, shkruhet në një tjetër pankartë.
Përmes këtyre mesazheve, protestuesit kanë ironizuar qeverinë dhe kanë akuzuar mazhorancën për standarde të dyfishta në raport me drejtësinë dhe problemet që shqetësojnë qytetarët.
Protesta e 108-të vjen në vijim të aksioneve të përsëritura opozitare kundër qeverisë Rama, ndërsa pankartat janë kthyer në një nga mënyrat kryesore përmes të cilave protestuesit përcjellin mesazhet e tyre politike.
