Kuzhina juaj duhet të jetë një vend për shoqërim, argëtim dhe gatim, gjë që e bën njërën nga hapësirat më të rëndësishme dhe më të dashura në shtëpi. Zgjedhja e ngjyrës së duhur për kuzhinën ka një ndikim të madh në atmosferën dhe pamjen e saj
Idetë për kuzhinën mund të ndryshojnë tërësisht në varësi të paletës së zgjedhur të ngjyrave. Ngjyra mund ta hapë hapësirën dhe ta bëjë të duket më e madhe, të ndajë zona të ndryshme, si dhe t’i japë ambientit pamje rustike apo moderne.
Një fillim i shkëlqyer është të mbështeteni tek stili arkitekturor apo lloji i dollapëve të kuzhinës – nëse janë elegantë dhe modernë, tradicionalë apo rustikë, zgjedhja e ngjyrës së duhur me ndikim historik i jep dizajnit kontekst dhe veçanti, thonë ekspertët.
Si ta zgjidhni ngjyrën më të mirë për kuzhinën?
Kur zgjidhni ngjyrat për kuzhinën, është e rëndësishme të merrni parasysh ngjyrat që tashmë ekzistojnë në hapësirë – mobiliet, dyshemeja apo pajisjet, të gjitha këto duhet të jenë pjesë e paletës suaj. A ka elemente arkitekturore apo detaje të veçanta që doni t’i theksoni? Ngjyra është një mënyrë e shkëlqyer për të vënë në pah një detaj të preferuar.
Ngjyrat më të përshtatshme për të lyer kuzhinën varen nga madhësia e hapësirës, sasia e dritës natyrale që merr dhe mënyra se si planifikoni ta përdorni kuzhinën. Ndryshimi i ngjyrës së murit është një ide e përballueshme që mund të freskojë dhe të transformojë tërësisht ambientin, transmeton Telegrafi.
Cila është ngjyra më e mirë për një kuzhinë të vogël?
Për kuzhinat e vogla, qëllimi është që drita të reflektohet dhe përmes “pasqyrimit” të krijojë iluzionin e një hapësire më të madhe. Prandaj, tonet neutrale dhe të ngrohta janë ideale për muret, ato e bëjnë hapësirën më të këndshme, të ndritshme dhe mikpritëse.
Ngjyrat pastel si e verdha e zbehtë, bluja bebe apo rozë e lehtë janë zgjedhje të shkëlqyera nëse dëshironi të sillni pak ngjyrë pa e rënduar ambientin. Muret apo dollapët e çelur kombinohen bukur me tekstura natyrore, sipërfaqet e punës prej graniti apo mermeri dhe raftet prej druri i shtojnë thellësi dhe karakter hapësirës.
Cila është ngjyra më e mirë për një kuzhinë të madhe?
Kuzhinat e mëdha ofrojnë shumë më tepër liri për të përdorur nuanca më të errëta, qoftë për muret, elementët e kuzhinës apo ishullin qendror.
Ngjyrat e errëta, si blu e thellë, kafe apo gri qymyri, i japin hapësirës thellësi, ngrohtësi dhe një prekje luksi. Ato ndihmojnë që një kuzhinë e madhe të mos duket e ftohtë dhe e zbrazët, por e ngrohtë dhe intime.
Pra, nëse keni një kuzhinë të gjerë dhe shumë dritë natyrale, mos ngurroni të përdorni nuanca të errëta, ato do t’i japin karakter dhe ngrohtësi ambientit tuaj.
