Thesari prej 20 miliardë dollarësh në fund të detit: Zbulohen pamjet mahnitëse të anijes legjendare San José
Tre shekuj pas fundosjes së saj në Karaibe nga një sulm britanik, janë zbuluar pamjet më të qarta ndonjëherë të anijes së famshme spanjolle San José, e njohur si “graali i shenjtë i anijeve të mbytura”. Studiues kolumbianë kanë publikuar imazhe nënujore që tregojnë qartë thesarin e saj të pabesueshëm: ar, argjend, smeralde dhe sende luksoze.
San José u mbyt në qershor të vitit 1708, pranë brigjeve të Kolumbisë së sotme, ndërsa mbante në bord një pasuri që sot vlerësohet deri në 20 miliardë dollarë.
Vetëm 11 nga 600 marinarët mbijetuan. Imazhet e reja, të realizuara me mjete robotike të telekomanduara, tregojnë qartë monedha argjendi të prodhuara në vitin 1707 në Limë të Perusë, por edhe porcelan kinez dhe topa lufte të shekullit XVII.
Anija i përkiste kurorës spanjolle dhe po udhëtonte si pjesë e një flote thesaresh kur u kap në befasi nga marina britanike, gjatë Luftës së Trashëgimisë Spanjolle. Debati për të drejtat mbi thesarin ka ndezur mosmarrëveshje mes qeverisë kolumbiane, kompanive amerikane kërkimore dhe qeverisë spanjolle.
Sipas presidentit Petro, Kolumbia ka në plan të nxjerrë në sipërfaqe anijen përpara përfundimit të mandatit në vitin 2026. Deri atëherë, historia e saj mbetet një kapitull magjepsës mes luftës, pasurisë dhe politikës nënujore.
