“Epoka e influencerëve”, rrjetet sociale bëhen burimi kryesor i lajmeve në SHBA
Rrjetet sociale dhe platformat e videove janë bërë burimi kryesor i informimit për qytetarët amerikanë, duke lënë pas televizionin tradicional dhe faqet e lajmeve.
Sipas një studimi të publikuar nga Instituti Reuters për Studime të Gazetarisë, 54% e amerikanëve marrin lajmet kryesisht nga platforma si Facebook, X (ish-Twitter) dhe YouTube, krahasuar me 50% që ndjekin lajmet në televizion dhe 48% përmes faqeve apo aplikacioneve të lajmeve.
Raporti thekson se rritja e ndikimit të rrjeteve sociale dhe përmbajtjes së bazuar në figura të njohura publike nuk është e veçantë vetëm për SHBA-në, por ndryshimet atje po ndodhin më shpejt dhe me më shumë ndikim se në vende të tjera.
Në këtë kontekst, podkasteri Joe Rogan rezulton të jetë personaliteti më i ndjekur në SHBA për sa i përket komenteve apo përmbajtjes me karakter informativ, me 22% të të anketuarve që kanë hasur përmbajtje prej tij gjatë javës së fundit.
Sipas autorit të raportit, Nic Newman, “ngritja e videove sociale dhe e lajmeve të përqendruara te personalitetet përbën një sfidë serioze për botuesit tradicionalë”.
Raporti thekson gjithashtu një tendencë të politikanëve që të preferojnë intervistat me figura të afërta në rrjetet sociale, në vend të gazetarëve të mediave tradicionale.
“Politikanët populistë në mbarë botën po shmangin gjithnjë e më shumë gazetarinë tradicionale, duke u orientuar nga mediat partizane, figurat e rrjeteve sociale dhe ‘influencerët’ që rrallë bëjnë pyetje të vështira, ndërsa shpesh ndihmojnë në përhapjen e narrativave të rreme apo dezinformimit,” thuhet në raport.
Pavarësisht popullaritetit të tyre, influencerët dhe personalitetet online janë identifikuar si një nga burimet kryesore të informacionit të rremë ose të shtrembëruar. 47% e njerëzve në mbarë botën i konsiderojnë ata po aq të pabesueshëm sa edhe politikanët.
Raporti vëren gjithashtu se përdorimi i rrjetit X për ndjekjen e lajmeve është në rritje ose i qëndrueshëm në shumicën e tregjeve, me rritjen më të madhe të regjistruar në SHBA. Që nga marrja në kontroll e platformës nga Elon Musk në vitin 2022, përdoruesit me prirje të djathta politike – veçanërisht meshkujt e rinj – janë shtuar ndjeshëm, ndërsa publiku progresist ka ulur aktivitetin ose është larguar nga platforma.
Në SHBA, përqindja e përdoruesve që vetëidentifikohen si të djathtë është trefishuar pas marrjes së platformës nga Musk, ndërsa në Britani, publiku me qëndrime të djathta pothuajse është dyfishuar.
Platformat alternative si Threads, Bluesky dhe Mastodon vazhdojnë të kenë ndikim minimal në arenën globale të informimit, me një pjesëmarrje prej 2% ose më pak për ndjekjen e lajmeve, sipas raportit.
