Real Madrid është bërë skuadra e dytë në botë – nga çdo sport – që kalon kufirin prej 1 miliard dollarësh në të ardhura vjetore, duke forcuar pozicionin e saj në krye të listës prej 30 klubeve që, së bashku, vlejnë 72 miliardë dollarë.
Ky “kurorëzim” po bëhet thuajse rutinë: për të katërtin vit radhazi dhe për të nëntën herë në 12 renditjet e fundit të revistës Forbes, Real Madrid është skuadra më e vlefshme e futbollit në botë, me një vlerë prej 6.75 miliardë dollarësh, një rritje prej 2% krahasuar me vitin 2024. Këtë vit, klubi ka edhe një “gur të çmuar” të ri në kurorën e tij.
Gjatë sezonit 2023-24, Los Blancos gjeneruan 1.13 miliardë dollarë në të ardhura – duke u bërë klubi i parë i futbollit që thyen kufirin e një miliardi në një vit të vetëm. Deri më tani, vetëm Dallas Cowboys nga NFL kishin arritur këtë shifër, duke e kaluar për herë të parë në 2021 dhe më pas duke arritur 1.2 miliardë në 2023.
Në futboll, më afër tyre për nga të ardhurat qëndron Manchester City, me 901 milionë dollarë të ardhura sezonin e kaluar.
Por është skuadra tjetër e qytetit – Manchester United – ajo që ndjek më nga afër Real Madridin për nga vlera: 6.6 miliardë dollarë, duke ruajtur avantazhin ndaj Barcelona-s, e cila renditet e treta me 5.65 miliardë dollarë.
Në total, 30 skuadrat më të vlefshme të futbollit vlejnë mbi 72 miliardë dollarë, me një mesatare prej 2.4 miliardë dollarësh për klub, një rritje 5% nga mesatarja e vitit 2024 (2.26 mld). Lista përfshin:
- 12 skuadra nga Premier League
- 4 nga Serie A italiane
- 3 nga La Liga spanjolle
- 2 nga Bundesliga gjermane
- 1 nga Ligue 1 franceze
- 8 skuadra nga MLS (ShBA) – më e vlefshmja, LAFC, renditet e 15-ta me 1.25 miliardë dollarë.
Futbolli evropian dhe përfitimet nga turnetë ndërkombëtarë
Skuadrat evropiane përfitojnë nga kompeticionet si Liga e Kampioneve, ku fitimi i titullit nga Real Madrid solli 154 milionë dollarë në shpërblime. Edhe Atalanta, fituese e Ligës së Europës, fitoi rreth 38 milionë dollarë – një lajm i mirë për Manchester United, i cili, pavarësisht rënies në vendin e 16-të në Premier League, arriti në finalen e turneut.
Manchester United dhe Real Madrid vazhdojnë të mbështeten edhe te fuqia e brendit të tyre global dhe partneriteteve tregtare fitimprurëse. Real Madrid përfitoi gjithashtu nga rinovimi i stadiumit Santiago Bernabéu për një kosto prej 1.9 miliardë dollarësh, çka pritet të rrisë ndjeshëm të ardhurat nga ndeshjet.
Pse Dallas Cowboys vlen më shumë se Real Madrid, megjithëse fitojnë njësoj
Pavarësisht të ardhurave të ngjashme, Dallas Cowboys vlejnë 10.1 miliardë dollarë, mbi 3 miliardë më shumë se Real Madrid. Arsyeja është shumëzuesi i vlerësimit të përdorur në sporte të ndryshme. Në NFL, vlerësimi është mesatarisht 9 herë të ardhurat, në NBA shkon në 11.7 herë, ndërsa për 22 klubet evropiane të futbollit të vlerësuara nga Forbes, mesatarja është 5.1 herë të ardhurat.
Sfidat e futbollit evropian krahasuar me Amerikën
Klubet evropiane përballen me:
- Borxhe të larta
- Kufizime në pronësi
- Rritje të dobët ose ulje të të drejtave televizive
- Burokraci për ndërtimin/rikonstruksionin e stadiumeve
- Mungesë të tavanit të pagave
- Frikë nga rënia nga liga
- Kundërshti kulturore ndaj komercializimit
Në dhjetor, tifozët e Liverpool, Everton, Manchester United dhe Manchester City protestuan bashkërisht ndaj rritjes së çmimeve të biletave. Si rezultat, Liverpool dhe City vendosën të ngrijnë çmimet për sezonin e ardhshëm.
MLS dhe rritja në vlerësim pavarësisht të ardhurave më të ulëta
8Në MLS, klubet kanë një shumëzues mesatar 9.3 herë të ardhurat, çka bën që LA Galaxy, me vetëm 95 milionë dollarë të ardhura sezonin e kaluar, të vlejë 1 miliard dollarë – më shumë se Aston Villa, që kishte të ardhura 3-fish më të mëdha.
Kush po rritet më shumë? Arsenal dhe Newcastle
Në Europë, rritjen më të madhe vjetore e kanë shënuar:
- Arsenal, +31%, vlera tani $3.4 miliardë
- Newcastle United, +38%, vlera tani $1.1 miliardë
Pritshmëritë për të ardhmen
Klubet do të përfitojnë nga:
- Kupa e Botës për Klube e zgjeruar, që nis muajin tjetër në ShBA
- Kupa e Botës FIFA 2026 në Amerikën e Veriut, që pritet të rrisë ndjeshëm interesin
Inter Milan dhe Paris Saint-Germain mund të kenë rritje të mëdha në vlerë, në varësi të rezultatit të finales së Ligës së Kampionëve – fituesi do të përfitojë edhe 28 milionë dollarë shtesë.
Barcelona, ndërkohë, është duke ndjekur shembullin e Realit me rikonstruksionin e stadiumit Camp Nou, që pritet të përfundojë verën e ardhshme dhe mund ta ndihmojë të afrohet me pragun e 1 miliard dollarëve në të ardhura.
El Clásico – rivaliteti më i madh në futboll, në fushë dhe në financa.
