Pesë muaj në burg për 2 dollarë! Historia absurde që tronditi Nju Jorkun
Një rast i pabesueshëm nga Nju Jorku ka ekspozuar një dështim të rëndë të sistemit penal amerikan. Aitabdel Salem, 41 vjeç, me origjinë nga Algjeria, qëndroi pesë muaj pas hekurave, pa e ditur se mund të lirohej me vetëm 2 dollarë.
Salem ishte arrestuar në Manhattan për dyshime mbi vjedhjen e një palltoje dhe për rezistencë ndaj policisë. Fillimisht, atij iu caktua një garanci prej 25 mijë dollarësh, e pamundur për t’u përballuar. Por një javë më vonë, akuzat kryesore u hodhën poshtë, dhe mbetën vetëm dy shkelje të vogla për përdorim të kartave të falsifikuara të metrosë – për të cilat gjykata kishte vendosur një gjobë simbolike prej 1 dollar për secilën.
Ironikisht, askush nuk e informoi për këtë zhvillim. Salem vazhdoi të qëndronte në burg për muaj me radhë, ndërkohë që lirimi i tij do të kishte kushtuar vetëm 2 dollarë. Avokatët e rinj të tij, Glenn Hardy dhe Theodore Goldbergh, akuzuan mbrojtësin e mëparshëm për neglizhencë profesionale. “Ai mund të kishte qenë i lirë që ditën e parë,” deklaruan ata për media.
Sipas startup-it “Betterbail”, një kompani që analizon praktikat e gjobave dhe mbrojtjes ligjore, kjo është një situatë që përsëritet shpesh. Në Nju Jork, përdorimi i “gjobave simbolike” është një praktikë e zakonshme për ata që përballen me disa akuza njëherësh, por mungesa e transparencës mund të çojë në padrejtësi të rënda.
Rasti ka ndezur sërish debatet për reformën e sistemit të drejtësisë penale dhe për efektivitetin e avokatëve të caktuar nga shteti për qytetarët me të ardhura të ulëta.
