Vendimi i Hagës/ 1 milion shqiptarë protestë në Prishtinë

Më 16 shtator, sytë e gjithë botës shqiptare do të drejtohen nga Haga dhe Prishtina.

Dhomat e Specializuara kanë caktuar shpalljen e vendimit të shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit.

Në Prishtinë pritet një tubim jashtëzakonisht i madh në mbështetje të ish-drejtuesve të Ushtrisë Çlirimtare të Kosovës.

Flitet se pjesëmarrja mund të arrijë deri në një milion shqiptarë nga Kosova, Shqipëria, Maqedonia e Veriut, Mali i Zi dhe diaspora. Por kjo shifër mbetet ende e pakonfirmuar zyrtarisht.

Megjithatë, një gjë është e sigurt: atmosfera në Kosovë është e elektrizuar.

Për shumicën dërrmuese të shqiptarëve, Hashim Thaçi dhe bashkëluftëtarët e tij luftën për lirinë e Kosovës. Ata kanë mohuar akuzat, ndërsa prokuroria ka kërkuar dënime deri në 45 vjet burg.

Një vendim dënimi, veçanërisht nëse parashikon shumë vite burg, mund të shkaktojë një tronditje të fortë emocionale dhe politike në Kosovë.

Ka informacione dhe paralajmërime jozyrtare se një vendim i tillë mund të pasohet nga tensione dhe trazira në Prishtinë.

Këto informacione nuk duhen shpërfillur, por as nuk duhet të përdoren për të mbjellë panik. Institucionet e Kosovës duhet të marrin të gjitha masat për garantimin e sigurisë, pa cenuar të drejtën e qytetarëve për të protestuar.

Policia duhet të jetë në shërbim të rendit dhe jo të provokimit. Nga ana tjetër, organizatorët e tubimit mbajnë një përgjegjësi historike.

Ata duhet të garantojnë që çdo reagim të mbetet paqësor, dinjitoz dhe kombëtar. Një milion shqiptarë të bashkuar në shesh do të ishin një mesazh shumë më i fuqishëm sesa një grup njerëzish që përplasen me policinë apo dëmtojnë institucionet.

Çdo akt dhune do ta largonte vëmendjen nga procesi ndaj drejtuesve të UÇK-së dhe do t’u jepte kundërshtarëve të Kosovës pamjet që kërkojnë.

Serbia dhe propaganda e saj do të përpiqeshin ta paraqisnin Kosovën si një shtet të paqëndrueshëm dhe shqiptarët si një popull që nuk respekton drejtësinë.

Kosova nuk duhet t’ua japë këtë mundësi. Zemërimi mund të jetë i madh, por përgjigjja duhet të jetë politike, juridike dhe demokratike.

Edhe në rast të një vendimi dënimi, procesi nuk përfundon më 16 shtator. Mbrojtja ka të drejtën e ankimit dhe beteja ligjore do të vazhdojë.

Prandaj, kjo ditë duhet të shndërrohet në një demonstrim madhështor të solidaritetit shqiptar, jo në një natë dhune.

Hashim Thaçi, Kadri Veseli, Rexhep Selimi dhe Jakup Krasniqi kanë nevojë për mbështetjen e popullit të tyre, por jo për trazira që mund ta dëmtojnë Kosovën.

Ata luftuan që Kosova të ishte e lirë, demokratike dhe e orientuar nga Perëndimi. Askush nuk ka të drejtë ta përdorë emrin e tyre për të sulmuar shtetin e Kosovës.

Më 16 shtator do të sprovohet jo vetëm drejtësia e Hagës, por edhe pjekuria politike e Prishtinës.

Drejtuesit politikë duhet të lënë mënjanë ndasitë dhe të dalin me një mesazh të përbashkët: mbështetje për çlirimtarët dhe zero tolerancë ndaj dhunës.

Kosova ka të drejtë të protestojë. Shqiptarët kanë të drejtë ta kundërshtojnë një vendim që e konsiderojnë të padrejtë. Por askush nuk duhet të lejohet ta kthejë protestën në kaos.

Më 16 shtator, Prishtina duhet të dëshmojë se është kryeqyteti i një shteti europian.

Një det njerëzish, flamujsh dhe zërash paqësorë do të trondiste ndërgjegjen ndërkombëtare shumë më tepër se çdo gur apo përplasje.

Mesazhi duhet të jetë i qartë dhe i fuqishëm: Drejtësi për Hashim Thaçin dhe drejtuesit e UÇK-së! Por asnjë trazirë që mund ta plagosë Kosovën.