Hetimet në Greqi vijojnë për të përcaktuar shkakun e vdekjes së Giorgos Mazonakis. Autopsia nuk ka dhënë ende një përgjigje përfundimtare dhe priten analizat toksikologjike dhe laboratorike. Mjeku ligjor shtetëror dhe eksperti i caktuar nga familja kanë rënë dakord se, në këtë fazë, shkaku i vdekjes nuk mund të përcaktohet me siguri.
Dyshimet janë përqendruar te orët që këngëtari kaloi në klinikën private në Athinë. Mazonakis kishte shkuar në klinikë për një procedurë të planifikuar, por ka një mospërputhje të rëndësishme në dëshmitë për kohën e mbërritjes së tij. Një prej mjekeve ka deklaruar se ai kishte mbërritur rreth orës 16:30, ndërsa pamjet e kamerave të sigurisë dyshohet se tregojnë se ai kishte hyrë në klinikë pak pas orës 13:00. Ambulanca u thirr rreth orës 16:30, pasi gjendja e tij u përkeqësua.
Por çfarë kishte shkuar të bënte Mazonakis në klinikë? Sipas hetimit, ai ishte paraqitur për plazmaferezë, një procedurë mjekësore gjatë së cilës plazma ndahet dhe filtrohet nga gjaku, përpara se komponentët e nevojshëm t’i rikthehen pacientit. Hetuesit po përpiqen të përcaktojnë nëse procedura kishte nisur në momentin kur këngëtari pësoi arrest kardiak.
Kjo ka ngritur edhe pyetje për vetë klinikën dhe nëse procedura mund të kryhej ligjërisht në atë ambient. Autoritetet po kontrollojnë licencimin e strukturës, kushtet në të cilat kryhej procedura dhe pajisjet që dispononte klinika. Pra, nuk bëhet fjalë thjesht për pyetjen nëse plazmafereza është një procedurë e lejuar në mjekësi — ajo është një procedurë mjekësore e njohur — por nëse ishte e autorizuar të kryhej në atë strukturë dhe në ato kushte konkrete.
Në qendër të hetimit janë tashmë edhe dy mjekë. Ata u arrestuan pas kontrollit në klinikë dhe ndaj tyre është hapur një çështje për shkaktim të vdekjes nga pakujdesia. Hetuesit po verifikojnë veprimet e tyre, kohën e ndërhyrjeve, përdorimin e pajisjeve dhe nëse ka pasur vonesë në kërkimin e ndihmës urgjente.
Megjithatë, deri tani nuk është provuar se plazmafereza apo veprimet e mjekëve kanë shkaktuar vdekjen e Mazonakis. Kjo është pikërisht ajo që hetimi dhe analizat mjekoligjore po përpiqen të përcaktojnë.
