Fier/ Katër biznese të grabitura brenda 10 ditësh, arrestohet 30-vjeçari Ysen Driza
Operacioni policor “Precedenti” në Fier, zbardhen katër vjedhje me thyerje. I dyshuari kishte precedentë të mëparshëm në fushën e vjedhjes.
Katër biznese në qytetin e Fierit kanë rënë pre e vjedhjeve me thyerje gjatë muajit tetor. Pas hetimeve dhe verifikimit të kallëzimeve të bëra nga pronarët e subjekteve, policia ka arritur të identifikojë dhe të arrestojë autorin e dyshuar.
Në pranga ka përfunduar 30-vjeçari Ysen Driza, banues në Fier, i cili ishte shpallur më parë në kërkim për vjedhje. Sipas policisë, ai dyshohet se gjatë periudhës 19–28 tetor ka kryer katër vjedhje në biznese të ndryshme, duke marrë shuma parash, dy telefona celularë dhe pajisje elektronike, mes tyre edhe serverin e sistemit të kamerave të sigurisë.
Më poshtë komunikata zyrtare e Policisë:
Fier/Finalizohet operacioni i koduar “Precedenti”, zbardhen 4 raste të vjedhjes me thyerje në biznese të ndryshme, gjatë muajit tetor.
Kapet dhe vihet në pranga autori i dyshuar, i shpallur në kërkim për vjedhje.
30-vjeçari, me precedent kriminal në fushën e vjedhjes.
Shërbimet e Komisariatit të Policisë Fier, në vijim të punës për goditjen e veprimtarisë kriminale të vjedhjes së pronës dhe pasurisë, bazuar dhe në kallëzimet e disa qytetarëve, për vjedhje në bizneset e tyre, gjatë natës, kanë organizuar punën për zbardhjen e vjedhjeve, identifikimin dhe kapjen e autorëve.
Si rezultat i punës së shpejtë hetimore u finalizua operacioni i koduar “Precdenti”, gjatë të cilit u kap dhe u ndalua shtetasi Y. D., 30 vjeç, banues në Fier, i shpallur në kërkim për vjedhje.
Nga veprimet hetimore dyshohet se ky shtetas, gjatë periudhës 19.10.2026 – 28.10.2026, ka vjedhur me thyerje, në 4 biznese në qytetin e Fierit, shuma parash, 2 celularë dhe pajisje (serverin e kamerave).
Vijojnë hetimet për zbardhjen e vjedhjeve të tjera që mund të jenë kryer nga ky shtetas.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
